《客途秋恨》
白駒榮演唱
歌曲：http://bbs.009y.com/viewthread.php?tid=5262&replyID=13824&skin=1
【地水南音】涼風有信，秋月無邊。虧我思嬌情緒好比度日如年。小生係繆姓乃是蓮仙字，為憶多情嘅歌女叫做麥氏秋娟，見佢聲色與共性情人讚羨，佢更兼才貌就的確兩雙全。今日天隔一方難見面，是以孤舟沉寂晚景涼天。你睇斜陽照住嗰對雙飛燕，睇我獨倚篷窗我就思悄然，耳畔聽得秋聲桐葉落，又只見平橋衰柳鎖寒煙。唉，第一觸景係更添情懊惱，虧我懷人愁對嗰個月華圓。正係舊約難如潮有信，新愁深似海無邊，睇我呢種情緒悲秋同宋玉，況且客途嚟抱恨你話叫我對乜誰言。
近日聽得話有羽書馳牒報，重話干戈撩亂擾亂江村，嗰哋崑山玉石也遭焚毀，好似避秦男女入桃源。你係幽蘭不幸受污泥染，又怕賊星來犯月中仙。你話嬌花若被狂風損，嗰陣玉容無主你話倩乜誰憐。一定輾轉馬前遭血濺，日落魂歸玉化煙。你話若然你艷質係遭兇暴。我寧願同埋白骨去伴姐妝前。或者死後得成連理樹，好過生時常在呢個奈何天。但望慈航法力總要行方便，把楊枝甘露救出你火坑蓮，等你劫難逢凶俱化吉，嗰的災星魔障兩不相牽。虧我心似轆轤千百轉，空眷戀，嬌但得你平安願，我就任得你天邊明月都照向別人圓。
【轉乙反】聞擊柝，鼓三更，只見江楓漁火照住個愁人，幾度徘徊思往事，勸嬌唔好咁癡心，你話風塵不少不少憐香客，羅綺還多惜玉人，試問煙花誰不貪豪富，做乜你偏把多情向住小生，況且我窮途作客囊如洗，擲錦纏頭愧未能。
記得填詞偶寫嗰段胭脂井，你含情相伴對住盞銀燈，你細問我曲中何故事，我把陳後主個段風流講過你聞，講到兵困景陽家國破，歌殘玉樹後庭春，攜住二妃，攜住二妃藏井底，死生難捨難捨難捨佢嘅意中人。
【轉正線】你聞聽此言就多嘆息，重話風流天子更重係情真，但係唔該享盡嗰哋奢華福，就把錦繡江山毀路塵，你係女流也曉興亡恨，不枉梅花為骨雪為心，重話我珠璣滿腹實在原無價，我知你憐才情重更不嫌貧。唉，想到此情欲把嫦娥問，無奈見得楓林月色昏，遠望嗰處樓人影近，人影近，都莫非相逢呢一位係月下魂。
[此贴子已经被作者于2007-10-6 16:46:27编辑过]
