《六號門》之《胡二賣仔》
陳笑風、陳綺綺演唱

旦：【反線中板】老家翁，痛兒亡，哀傷成病一息奄奄，對孤燈，怕見兒枯黃顏面。老嘅病危，少嘅缺食，四壁皆空，欲哭無淚，使我更覺心酸！可恨馬家催債頻頻，出盡惡言逼舊欠，縱然是捱過這除夕，歲月茫茫，苦難到何年？
合：【清唱一句】年呀，逼人嘅年！
生：【反線慢板板面】恨你把窮人活路斷，我數日奔波未賺過一分錢，馬金龍派出一班鬼，到處不准僱用我胡二，此仇此恨有一天要清算。
　　【反線慢板】咬牙切齒，恨透馬金龍，恃勢凌人，逼到我無門可鑽。回家難……難救老父垂危，難止飢兒索食，夫妻相對也無言。
合：【反線慢板】天呀，殺了人的天，你為何不睜眼！
旦：大寶爹，你為何不把家還？可憐你幾天食不下嚥！
生：大寶娘，在我家未曾食過一餐飽飯，幾十年來受盡熬煎！
旦：風淒淒，你在外身無四兩棉，冷在你身，痛在我心，速歸來，一處死我也情願！
生：手空空，家門難入，徬徨無計，使我進退兩難。
旦：【反線秋江別】你可知我在家焦急等盼。
生：你可知我正徘徊門前。
旦：你快回來將爹見。
生：你可知我赤手空拳，正打算抱兒去賤賣錢，等他生有望。心想賣兒，但我未敢去接錢。
（小兒啼聲）
旦：（白）啊……仔呀！
生：【反線快打二流】不賣兒，難逃馬家閻王債；不賣兒，怎醫老父病奄奄；不賣兒，胡家老少難活明天。想到此，忍不住淚奪眶喉哽咽，想到此，只有挖心掏肝，我寶兒……
旦：大寶爹──
　　（白）你咁夜都未返嚟，去咗邊度呀？
生：唉！
旦：【續唱】盼得我淚眼望穿，此時不歸你千萬不可再生禍端，倘若是遇歹人又遭災難，拋下我老嘅少嘅，上天無路，入地無門，有誰可憐！
生：【反線嘆板】一紙賣身契，骨肉痛分離，捨此別無法想。今晚夜，有錢人家食團年飯；今晚夜，我賣親兒渡年關！唉吔吔……一見家門好比萬箭穿心！又覺得天旋地轉，天旋地轉！
旦：（白）唉吔，大寶爹！大寶爹！你醒一醒，你醒一醒呀，大寶爹，你……你有病呀？
生：（白）我……我冇病呀。
旦：（白）大寶爹，你咁夜至返嚟，搵到工做未呀？
生：（白）搵工做？哼！馬金龍趕絶咗我哋啦！
旦：（白）馬金龍！大寶爹，你到而家都仲未搵到工做，邊度有錢同阿爹執藥呢？
生：（白）呀，錢？啊，大寶媽，我哋……我哋有錢啦！
旦：（白）我哋有錢？啊，我哋真的有錢啦！
　　【十字清快中板】有了它，頓時我心稍安然，霎時間喜得我淚流滿面。幾天來，你未搵過一個銅錢，難為你在外邊流盡血汗。今夜我全家喜喜歡歡，歡歡喜喜，喜喜歡歡過新年。
　　（白）好囉，今晚我們可以全家食一餐飽嘅團年飯！係哩，我還要同阿爹執藥，我而家去啦！
生：（白）你……
旦：（白）大寶爹，如果去遲咗，Ｄ米又會起價咖啦！
生：（白）你等一等。
旦：（白）等一等？大寶爹，你還仲想買Ｄ乜嘢呀？
生：（白）唉……
旦：（白）大寶爹，乜你喊呀？
生：（白）我……我冇喊呀。
旦：（白）你睇下你Ｄ眼淚，到底出了乜嘢事幹？你有咁多錢，係邊度得來咖？
生：（白）呃，大寶媽，你唔好問嘞，你多睇寶兒幾眼啦！
旦：（白）嚇……你、你講乜嘢呀？
生：（白）我……我將寶兒賣咗啦！
旦：（白）啊？呢Ｄ是賣我仔嘅錢，呢Ｄ是賣我寶兒嘅錢，我不要，我不要。
生：（白）大寶媽，賣身契都打咗指模，錢都收咗嘞，你就俾我抱去啦！
旦：（白）大寶爹，你、你點能夠賣我嘅仔呢？
生：（白）大寶媽，你俾我抱去啦！
旦：（白）你放手，你放手！唉吔……
生：（白）大寶媽，大寶媽……大寶媽，你醒一醒呀，你醒一醒呀！
旦：（白）大寶爹，你……你太狠心嘞！你──
　　【乙反中板】你忍斷父子情，難道你全無善法，竟願把親生兒子賤賣錢！
　　【爽乙反七字清】我拼一生長貧賤，我拼飢寒苦迫煎，誰想奪我心頭肉，除非日出在西邊。
生：（白）唉，難道我想咁樣做咖咩！大寶媽，
　　【乙反南音】我與你多年夫婦，你亦素知我品性剛堅，誰願將連心骨肉換取血淚錢，只為數日謀工難如願，灶頭十日九無煙。雖則有眾兄弟幫扶，無奈佢哋心長力短，又豈能長此以往，把兄弟牽連。
　　【流水清歌】恨煞馬賊金龍兇又險，佢停工逼債陷我深淵，逼得我走投無路生機斷，生機斷，才有賣兒了結那閰王欠。
旦：（白）大寶爹──
　　【續唱】見他淚隨聲下，教我有口難言。
　　（白）大寶爹，你、你唔能夠賣我嘅仔咖！
生：（白）大寶媽，若果唔係咁樣，我們全家老少就唔過得聽日呀。大寶媽，你就放寶兒一條生路啦！
旦：（白）我……我放寶兒一條生路？寶兒，乖仔呀！
生：（白）你……唔好咁大聲呀！
　　【滾花】此事可急不可緩，爹爹醒來費周旋，不賣親兒沒路行！
旦：不賣親兒沒路行！
生：（白）我哋已經到咗絶路啦，你就俾我抱去啦！
旦：（白）你……你抱去啦！
生：（白）咁我去啦！
旦：（白）大寶爹，你……
　　【滾花】你許我淚眼再看兒瘦面，仔呀，你要永記胡家三代與馬家仇恨不共戴天！

[ 本帖最后由 xecniw 于 2007-11-30 19:35 编辑 ]

我来一顶！

多谢